माघ २६ वीरगञ्ज ,  वीरगञ्ज महानगरपालिका आदर्शनगरस्थित एक स्टोरमा भन्सार छलीका सामान छापा मार्न गएको सशस्त्र प्रहरी बलको संयुक्त टोलीमाथि केही स्थानीयले आक्रमण गर्दा तीन जना सशस्त्र प्रहरी घाइते भएका छन् ।
आज माघ २६ गते बिहान करिब १०:३० बजे विशेष सूचनाको आधारमा आदर्शनगरस्थित मदनप्रसाद गुप्ताको घरमा अवैध रूपमा भन्सार छली गरि  लुकाई-छिपाई राखिएको सामान छापामार्न एपीएफ सीमा सुरक्षा गुल्म मुख्यालय वीरगञ्जका डीएसपी विकास अधिकारीको कमाण्डमा १० जना, गण हे.क्वा. पर्साबाट इन्स्पेक्टर सापकोटाको कमाण्डमा ९ जना साथै वीरगञ्ज भन्सार कार्यालयका तथ्यांक अधिकृत भागीरथ रौनियारको कमाण्डमा २ जनाको संयुक्त टोली परिचालित थियो ।
अवैध रूपमा भन्सार छली गरि लुकाई-छिपाई राखिएको सामान छापमारी  लोड गर्ने क्रममा स्थानीयहरू २०-२५ जनाको समूहले अचानक ढुंगामुढासहित आक्रमण गरेपछि स्थिति तनावग्रस्त बनेको सशस्त्र प्रहरी बल मधेश प्रदेश कार्यालयले जनाएको छ ।
स्थानीयहरूकाे आक्रमण बाट बागमती प्रदेश एफ ए ए ०१२५ नम्बरको गाडीको अगाडिको सिसा फुटेको छ , एपीएफको स्कार्पियोमा पनि क्षति पुग्नुकाे साथै सशस्त्र प्रहरी वरिष्ठ सिपाही महमद मुस्ताक अलीको बायाँ हातमा चोट लागेको र उनको मोबाइल फोन खोसेर लगिएको, सशस्त्र प्रहरी हवल्दार जितेन्द्र प्रसाद सहनीको बायाँ गोडामा सामान्य चोट लागेको तथा नं. १३ गण पर्सामा कार्यरत सशस्त्र प्रहरी सहायक हवल्दार जितेन्द्र पासवानको टाउकोमा सामान्य चोट लागेको सशस्त्र प्रहरी बल मधेश प्रदेश कार्यालयले जनाएको छ ।
संयुक्त टोलीले करिब ५ लाख मूल्य बराबरका भन्सार छलीका ५ पोका कपडा बरामद गरेको छ , बरामद सामग्री भन्सार कार्यालय बुझाउने प्रक्रिया भइरहेको र सुरक्षा टोलीमाथि आक्रमणमा संलग्न हुने स्थानीयहरूकाे पहिचान गरी आवश्यक कानुनी कारबाहीका लागि स्थानीय प्रशासन र प्रहरीसाग समन्वय भइरहेको सशस्त्र प्रहरी बल मधेश प्रदेशका प्रमुख डीआईजी कृष्ण ढकालले जानकारी गराउनु भयाे ।