असार २९, काठमाडौं । काठमाडौंमा नर्भिक इन्टरनेशनल अस्पतालको क्षमता बढाउने र उपत्यकाबाहिर समेत बिस्तार गर्ने योजना सहित कम्पनीले पुँजीवृद्धि गर्न लागेको छ । अब भने यस अस्पताल पब्लिक कम्पनीमा रुपान्तरण भएको छ । 

कम्पनीका सूचना अधिकारी सोमनाथ बास्तोलाले सर्वसाधारण लगानीकर्तालाई समेत प्राथमिक साधारण सेयर निष्कासन गरिने बताए । उनले भने, ‘हामी पब्लिक कम्पनीमा रुपान्तरण हुने मूख्य उद्देश्य नै अस्पतालको सेवा बिस्तार गर्नु र त्यसमा सर्वसाधारणको हिस्सा समावेश गर्नु हो ।’ 

उनका अनुसार आईपीओ कहिले र कुन मोडलमा ल्याउने भन्नेबारे अझै छलफल भएको छैन । सम्भवतः यो प्रक्रियाले निरन्तरता पाउन २/३ वर्ष अझै लाग्न सक्ने उनको भनाइ छ । यो योजना सफल भएमा सर्वसाधारणमा सेयर जारी गर्ने नर्भिक मेडिकल क्षेत्रको पहिलो कम्पनी बन्ने छ ।

थप १ सय सैया क्षमता बढाउने अस्पतालको योजना सहित कम्पनीले पुँजीवृद्धि गर्न लागेको हो । त्यसैगरी नर्भिकले सुनसरीको दुहवी र भैरहवामा १ सय सैयाको अस्पताल बनाउने योजना गरेको छ । ती स्थपना हुने अस्पतालहरुमा नर्भिकको मात्रै सबै लगानी नभई सर्वसाधारण र अन्य लगानीकर्तालाई समेत सहभागी गराउने योजना कम्पनीले लिएको छ ।