जेठ ३१, काठमाडौँ । यस वर्षको माध्यमिक शिक्षा परीक्षा (एसईई)को नतिजा साउन दोस्रो साता सार्वजनिक गर्ने तयारी गरिएको छ ।

राष्ट्रिय परीक्षा बोर्डले आगामी असार २० गते भित्र विद्यार्थीको प्राप्तांक जिल्लास्थित शिक्षा विकास तथा समन्वय इकाइमा पठाउन देशभरका विद्यालयलाई निर्देशन दिएको छ ।  

सोमबार बोर्डले सूचना प्रकाशित गरी प्राप्तांक विद्यालयले असार २० भित्र इकाइमा र इकाइले असार मसान्तभित्र बोर्डमा पठाइसक्नुपर्ने जनाएको हो । 

बोर्डले कार्यविधि २०७७ र संशोधन गरी २०७८ जारी गर्ने तयारी गरेको छ । कक्षा १० को विद्यार्थी मूल्यांकन, नतिजा प्रकाशन तथा प्रमाणीकरण कार्यविधि २०७८ बमोजिम प्राप्तांक पठाउन निर्देशन दिइएको छ । कार्यविधिको अनुसूचीमा समाविष्ट फारामहरूमा विधिको नम्बर भरेर पठाउनुपर्ने बोर्डले जनाएको छ ।

गत वर्ष विषयशिक्षक र विद्यालयले विद्यार्थीलाई नम्बर बढाएर दिइएको पाइएको थियो । यसपालि समितिले पठाएको नम्बर अस्वाभाविक लागे इकाइप्रमुखले मूल्यांकन फिर्ता पठाउन सक्ने व्यवस्थासमेत गरिएको छ । अस्वाभाविक नम्बर दिँदा कारण र पुष्टिसमेत दिनुपर्ने बोर्डले जनाएको छ । 

विद्यालयले पठाएको नम्बर असार २० गतेभित्र रुजु गरेर इकाइले बोर्डमा पठाउनुपर्नेछ ।