कार्तिक २६, रसुवा । धार्मिक आस्था, प्राकृतिक सौन्दर्य र जैविक विविधताले भरिपूर्ण रसुवाको प्रसिद्ध तीर्थस्थल गोसाइँकुण्डमा आन्तरिक तथा बाह्य पर्यटकको आगमन पुनः बढ्न थालेको छ । भदौ १० गते भोटेकोशी नदीमा आएको बाढीले सडक तथा पदमार्गमा क्षति पुर्‍याएपछि सुस्ताएको पर्यटन व्यवसाय आवागमन सहज बन्दै गएसँगै लयमा फर्किन थालेको हो ।
गोसाइँकुण्ड गाउँपालिकाका अध्यक्ष कैसाङ नुर्पु तामाङका अनुसार पछिल्लो समय पर्यटकको आगमन बढ्न थालेपछि होटल व्यवसायी, पथप्रदर्शक, यातायात मजदुर तथा स्थानीय साना व्यवसायीलाई राहत पुग्न थालेको छ । गाउँपालिकाले पदमार्गको मर्मतसम्भार, पर्यटकको सुरक्षा र सहज आवागमनका लागि आवश्यक समन्वय गरिरहेको अध्यक्ष  तामाङले  बताए ।
लाङटाङ राष्ट्रिय निकुञ्जका सूचना अधिकारी एवम् संरक्षण अधिकृत गणेशप्रसाद तिवारीले पनि बाढीपछि अवरुद्ध आवागमन सहज भएसँगै गोसाइँकुण्ड क्षेत्रमा पर्यटकको आगमन नियमित हुन थालेको जानकारी दिए ।
स्थानीय होटल व्यवसायी सन्तोष घलेका अनुसार पछिल्लो समय आन्तरिक पर्यटकसँगै युवापुस्ताको आकर्षण पनि बढ्दै गएको छ । पहिले जनैपूर्णिमा र गङ्गादशहरामा मात्रै बढी तीर्थयात्री पुग्ने गरेकामा अहिले वर्षभरिजसो पदयात्रा र घुमफिरका लागि पर्यटक आउने गरेका छन् । पदमार्गको स्तरोन्नति, सञ्चार सुविधा र आधारभूत पूर्वाधार विकास गर्न सके पर्यटनबाट स्थानीयको जीविकोपार्जन र राष्ट्रिय अर्थतन्त्रमा थप योगदान पुग्ने उनको भनाइ छ ।
समुद्री सतहबाट चार हजार ३८० मिटर उचाइमा रहेको गोसाइँकुण्ड रसुवाको गोसाइँकुण्ड गाउँपालिका–६ मा अवस्थित छ । हिन्दू तथा बौद्ध धर्मावलम्बीको साझा आस्थाको केन्द्रका रूपमा परिचित यस कुण्डलाई भगवान् शिवसँग जोडिएको पवित्र तीर्थस्थल मानिन्छ ।
गोसाइँकुण्ड आसपासमा भैरवकुण्ड, सरस्वतीकुण्ड, सूर्यकुण्ड, चन्द्रकुण्ड, दूधकुण्ड र गणेशकुण्डलगायतका कुण्ड रहेका छन् । यस क्षेत्रको प्राकृतिक सौन्दर्य, हिमाली जैविक विविधता, तामाङ संस्कृति र पदयात्रा मार्गले पर्यटकलाई आकर्षित गर्दै आएको छ ।
पारिस्थितिकीय महत्त्वका कारण गोसाइँकुण्ड क्षेत्र विसं २०६४ असोज ५ गते रामसार सूचीमा सूचीकृत भएको हो । यहाँ हिमचितुवा, रातो हाब्रे, कस्तुरी मृगलगायत दुर्लभ वन्यजन्तु तथा विभिन्न हिमाली वनस्पति पाइन्छन् ।
गङ्गादशहरा र जनैपूर्णिमाका अवसरमा विशेष मेला लाग्ने गोसाइँकुण्ड नेपालकै प्रमुख धार्मिक तथा पर्यटकीय गन्तव्यका रूपमा परिचित छ । सडक तथा पदमार्गको दिगो सुधार र आवश्यक पूर्वाधार विकास गर्न सके यस क्षेत्रको पर्यटनले अझ गति लिने अपेक्षा गरिएको छ ।