राष्ट्रिय ट्रमा सेन्टरले ८८ लाख रुपैयाँमा खरिद गर्यो ‘क’ वर्गको एम्बुलेन्स

शुक्रबार ३० माघ, २०७७ विचारवाटिका 2736

माघ ३०, काठमाडौं । राष्ट्रिय ट्रमा सेन्टरले गम्भीर खालका बिरामीका लागि अत्यावश्यक सुविधा भएको ‘क’ वर्गको एम्बुलेन्स (मोबाइल एम्बुलेन्स) ८८ लाख रुपैयाँमा खरीद गरेको छ ।

अस्पतालका निर्देशक डा सन्तोष पौडेलका अनुसार उक्त एम्बुलेन्स करिब एक सातापछि सञ्चालनान ल्याइनेछ ।

दुई वटा ‘क’ वर्गको एम्बुलेन्स सञ्चालन गर्ने योजना रहेको निर्देशक पौडेलले बताए । यसका लागि आफुहरुसँग भएको ‘ख’ वर्गको एम्बुलेन्सलाई स्तरोन्नति गर्ने उनले बताए ।

यो नयाँ एम्बुलेन्स सहित राष्ट्रिय ट्रमा सेन्टरमा एम्बुलेन्सको संख्या तीन पुगेको छ । जसमध्ये एउटा ‘ग’ वर्गको एम्बुलेन्स पनि छ ।

‘क’ वर्गको एम्बुलेन्स सरकारी अस्पतालहरुमा सञ्चालन गर्न सके गम्भीर खालका बिरामीलाई धेरै सहज हुने अस्पतालको भनाई छ ।

एम्बुलेन्सको आवश्यक पर्ने २० प्रतिशत बिरामीहरुलाई पारामेडिक्स तथा स्वास्थ्यकर्मीको सहायता चाहिने डा पौडेलले बताए ।

उनका अनुसार बाँकी ८० प्रतिशत बिरामीलाई अस्पताल पुग्नसम्म मात्र एम्बुलेन्सको आवश्यक पर्छ ।