शुक्रबार १९ मंसिर, २०७७ (Friday December 04, 2020)

काठमाडौंमा प्रशासन कार्यालयको सम्पूर्ण सेवा सुचारुः कुन बार के सेवा लिन सकिने ?

बिहीबार १ आश्विन, २०७७ विचारवाटिका 1367

असोज, १ काठमाडौं । कोरोना संक्रमणको जोखिम बढेकोले जिल्ला प्रशासन कार्यालय काठमाडौंले साउन २५ देखि स्थगित गरेका सेवाहरु असोज ४ गते आइतबारदेखि पुनः सञ्चालन गर्ने भएको छ ।

जिल्ला प्रशासन कार्यालयले बिहीबार सूचना जारी गरी सम्पूर्ण सेवाहरु खुला हुने जानकारी दिएको छ । 

नयाँ नागरिकता, नागरिकताको प्रतिलिपी, नाबालक परिचयपत्र, राहदानी, हातहतियार दर्ता, पत्रपत्रिका, संघसंस्था दर्ता र नवीकरणसम्बन्धी सेवा असोज ४ देखि खुला हुने जनाईएको छ ।

तर कार्यालयमा सेवाग्राहीलाई आफ्नो स्वस्थ्य सुरक्षा अपनाई भिड–भाड नहुने गरी स्थानीय तहअनुसार सेवा लिने बार तोकिएको छ ।

प्रशासनले नागरिकता प्रमाणपत्र, नागरिकताको प्रतिलिपी, नाबालिग परिचयपत्र, राहदानी, हातहातियार दर्ता नवीकरण सेवा लिन एक दिनमा दुईवटा नगरपालिकाका नागरिकमात्र आउन पाउने गरी तालिका बनाएको जानकारी गरिएको छ । 

काठमाडौं महानगरपालिकाका सेवाग्राहीले आइतबार, मंगलबार र बिहीबार सेवा पाउनेछन् । त्यस्तै, कीर्तिपुर, नागार्जुन र चन्द्रागिरि नगरपालिकाका सेवाग्राहीले सोमबार, बुढानीलकण्ठ, टोखा, कागेश्वरी मनहरा नगरपालिकाका सेवाग्राहीले बुधबार र गोकर्णेश्वर, दक्षिणकाली, शंकरापुर र तारकेश्वर नगरपालिकाका सेवाग्राहीले शुक्रबार सेवा पाउनेछन् ।

संस्था दर्ताको काम सोमबार र बुधबारमात्र हुनेछ, नवीकरण आइतबार, मंगलबार र बिहीबार हुनेछ ।संघसंस्थाको प्रतिलिपि पत्रचारसम्बन्धी सेवा भने प्रत्येक दिनको ४ बजेपछि गरिने जिल्ला प्रशासन कार्यालय काठमाडौंले जनाएको छ । पत्रपत्रिका र छापाखाना दर्ता र विधान संशोधनको काम शुक्रबार मात्रै हुने सूचनामा उल्लेख गरिएको छ ।

त्यसैगरी सरकारी कार्यालय र आयोजनासँग सम्बन्धित समन्वय र छलफलको काम, शान्ति सुरक्षाको निवेदन र कानुन बमोजिम हुने मुद्दा सम्बन्धी कार्य,  हप्ताको छ दिन नै सञ्चालन हुने सूचनामा उल्लेख गरिएको छ ।




यसमा तपाइको मत


सम्बन्धित शीर्षकहरु