चैत १, काठमाडौं । वसन्त ऋतुमा दोस्रो आरोहण अनुमति मनास्लु हिमाल(८१६३ मिटर)का लागि जारी भएको छ । मनास्लु आरोहण गर्न एक जनाले आरोहण अनुमति लिएको पर्यटन विभागले बताएको छ । 

यसअघि पहिलो आरोहण अनुमति नुप्त्से हिमाल (७८६४ मिटर)का लागि भएको थियो । सो हिमालका लागि भने एउटा समूहका चार जनाले अनुमति लिएका छन् । 

सरकारले यी दुई आरोहण अनुमतिबाट ४ लाख ९० हजार रोयल्टीसमेत संकलन गरिसकेको छ । वसन्त ऋतुमा हिमाल आरोहणको प्रयोजनका लागि हरेक वर्ष ठूलो संख्यामा विदेशी पर्यटक भित्रन्छन् । गत वर्ष भने कोरोना महामारीका कारण आरोहणका सबै गतिविधि रद्ध भएका थिए ।