वैशाख ८, काठमाडौं । कतार सरकारले जुलाई १ तारिख अर्थात् असार १७ गतेदेखि हाल चलनचल्तीमा रहेको चौथो संस्करणका कतारको मुद्रा नचल्ने बताएको छ ।

कतार सरकारले चौथो संस्करणका बैंक नोटहरु चलनचल्तीबाट हटाउने निर्णय गरेसँगै कतारी रियाल यथाशीघ्र सटही गर्न नेपाल राष्ट्र बैंकले नेपालीहरुलाई आग्रह गरेको छ ।

त्यस्ता नोट भए आगामी २७ गतेसम्म सटही गर्न राष्ट्र बैंकले बताएको छ । २७ गतेपछि भने सटही गर्न बाध्य नहुने राष्ट्र बैंकले बताएको छ ।

यसअघि भारतले पूर्वजानकारी नै नदिई नोटबन्दी गर्दा ठूलो परिमाणको भारतीय रुपैयाँ नेपालीले साट्न पाएका थिएनन् ।

राष्ट्र बैंकको बैंकिङ विभाग, बैंकिङ कारोबार गर्ने राष्ट्र बैंकका प्रदेशस्थित कार्यालय, विदेशी विनिमयको कारोबार गर्न इजाजतप्राप्त बैंक तथा वित्तीय संस्था वा इजाजतप्राप्त मनिचेन्जरहरुबाट कतारी रियाल सटही गर्न सकिने केन्द्रीय बैंकले जनाएको छ ।