शुक्रबार २१ जेष्ठ, २०७८
जेठ २१, काठमाडौं । शुक्रबारदेखि काठमाडौं उपत्यकामा १० दिनको लागि थप गरिएको निषेधाज्ञाको पहिलोदिन सवारी साधनको चहलपहल धेरै देखिएको छ ।
सवारी साधन सञ्चालन सम्बन्धी व्यवस्थामा परिवर्तन नगरिएको भएपनि शुक्रबार उपत्यकाका सडकमा पहिलेभन्दा धेरै सवारी चलेको ट्राफिक प्रहरीले जनाएको छ ।
प्रहरीले भने अत्यावश्यक सेवाका बाहेक अन्य सवारीलाई रोकेर होल्डिङ सेन्टरमा राखेको छ । निषेधाज्ञा खुकुलो भयो भन्ने भ्रमका कारण पनि सवारी धेरै भएको प्रहरीको आकलन छ ।
निषेधाज्ञा खुकुलो भयो भन्ने आम धारणाका कारण सडकमा धेरै भिड बढेको हुन सक्ने नेपाल प्रहरीका प्रवक्ता वसन्त बहादुर कुँवरले बताए ।
प्रहरीले निषेधाज्ञा कार्यान्वयन गराउनको लागि काठमाडौंका विभिन्न स्थानमा चेकिङ गर्दै आएको छ । कोरोना संक्रमणका कारण भिडभाड गर्न बन्देज भए पनि प्रहरीको चेकिङ स्थलमा भने सवारी साधन र तिनका चालकहरूको भिड देखिन्छ ।
सरकारले शुक्रबारदेखि सुरु भएको निषेधाज्ञामा किराना पसल, वर्कसप, निर्माण कार्य लगायत खोल्न दिने निणर्य गरेको छ ।
