भाद्र २८ काठमाडौं, संविधानसभा अध्यक्ष एवंम् नेकपा (एमाले)का उपाध्यक्ष सुवास नेम्वाङको राजकीय सम्मानका साथ आज अन्त्येष्टि गरिएको छ । पशुपति आर्यघाटमा दुई छोरा मिङसो र सुहाङ नेम्वाङले दागबत्ती दिएका थिए । 

 नेम्वाङको पार्थिव शरीरमा वर्तमान प्रधानमन्त्री पुष्पकमल दाहाल प्रचण्डले राष्ट्रिय झण्डा ओढाएर अन्तिम बिदाइ गरेका थिए ।

नेम्वाङको मंगलबार निधन भएको थियो । बालुवाटारस्थित निवासमै बेहोस भएका उनलाई उपचारका लागि त्रिवि शिक्षण अस्पताल पुर्याउँदा चिकित्सकले मृत घोषणा गरेका थिए । सोही दिन बसेको मन्त्रिपरिषद बैठकले राजकीय सम्मानका साथ अन्त्येष्टि गर्ने र अन्त्येष्टिको दिन देशभर सार्वजनिक बिदा दिने निर्णय गरेको थियो ।

एक दिन एमाले केन्द्रीय कार्यालय च्यासलमा र अर्को एक दिन बालुवाटारस्थित निवासमा श्रद्धाञ्जलीका लागि राखेपछि आज नेम्वाङको पार्थिव शरीर पशुपति आर्यघाट पुर्याइएको थियो ।