फागुन २५, काठमाडौं । नेपाल पुलिस क्लबले विभागीय प्रतिस्पर्धी त्रिभुवन आर्मी क्लबलाई ३ विकेटले काठमाडौं मेर्यस कप क्रिकेटमा पराजित गरेको छ ।

मंगलबार मूलपानी क्रिकेट मैदानमा भएको खेलमा आर्मीले दिएको ८८ रनको लक्ष्य पुलिसले १८.३ ओभरमा ७ विकेट गुमाएर पूरा गर्यो ।

सामान्य लक्ष्य पछ्याएर ब्याटिङ गरेको पुलिसलाई रोक्न आर्मीका शाहब आलम एक्लैले ७ विकेट लिए तर टिमको हार टार्न सकेनन् ।

पुलिसका लागि ओपनर सुनील धमलाले सर्वाधिक ३९, दिलिप नाथले १५, पवन सर्राफले अविजित २२ रन बनाए । ४८ रन बनाउँदा १ विकेट मात्र गुमाएको पुलिसले त्यसपछि लगातार विकेट गुमाएको थियो ।

आर्मीका आलमले ९ ओभरमा १ मेडन राख्दै ४५ रन  खर्चेर ७  विकेट लिए ।

३०.१ ओभरमा पहिले ब्याटिङ गरेको आर्मीले सबै विकेट गुमाएर ८७ रन मात्र जोड्न सक्यो । उसका लागि लोकेश बमले सर्वाधिक ३२ रन बनाए । यसअघिका दुई खेलमा सोमपाल कामीसँगै ओपनिङ गरेका लोकेशले पुलिस विरुद्ध भने नवौं नम्बरमा ब्याटिङ गरेका थिए । उनले २४ बल खेल्दै २ चौका ३ छक्का प्रहार गरे । नवौं विकेटका लागि लोकेशले विक्रम सोबसँग ४१ रनको साझेदारी गरेका थिए । 

४३ रन हुँदा ८ विकेट गुमाएको आर्मीका लागि लोकेश र विक्रमको साझेदारीले केही रन भने बढेको थियो । विक्रमले १४ रन जोडे । त्यसैगरी रोहित पौडेलले १३ रन बनाए । यी तीनबाहेक अरु खेलाडीले दोहोरो अंकमा रन बनाउन सकेनन् ।

आर्मीविरुद्ध सागरले १० ओभरमा २ मेडन राख्दै ४० रन खर्चेर ५ विकेट लिए । यस्तै पवन सर्राफले १० ओभरमा ५ मेडन राख्दै १४ रन खर्चेर ३ विकेट लिए । ललित राजवंशीले ५.१ ओभर बलिङ गर्दा १ मेडन राख्दै १६ रन खर्चेर २ विकेट लिए ।

दोस्रो जित हात पारेको पुलिसले जारी प्रतियोगितामा फाइनल पुग्ने सम्भावना कायम राखेको छ । यसअघि बागमतीलाई पराजित गरेको पुलिस एपीएफसँग हारेको थियो । पुलिसले अब काठमाडौं मेयर्स ११ सँग खेल्न बाँकी छ ।

पहिलो खेलमा एपीएफसँग पराजित भएको आर्मीले काठमाडौं मेयर्स ११ लाई पराजित गरेको थियो । आर्मीले अब बागमतीसँग खेल्न बाँकी छ ।