चैत ६, काठमाडौं । विभिन्न प्रपञ्च रची काठमाडौंको धोबीखोला बग्नेमध्ये काठमाडौं महानगरपालिका–५ भत्केको पुल क्षेत्रमा रहेको सरकारी जग्गालाई भूमाफियाले आफ्नो नाममा बनाएनी मालपोत कार्यालय डिल्लीबजारले भूमाफियाको धन्दामा ब्रेक लगाईदिएको छ ।

यसअघि मन्त्रिपरिषद् र सम्बन्धित मन्त्रालयको मिलेमतोमा गुठी र व्यक्तिको नाममा गरिएको काठमाडौंको भत्केको पुलमा रहेको करोडौं रुपैयाँको आठ रोपनी तीन आना जग्गा पुनः सरकारको नाममा ल्याउने निर्णय मालपोत कार्यालय डिल्ली बजारले गरेको हो । 

सर्वोच्च अदालतको आदेशबमोजिम मालपोत कार्यालय डिल्लीबजारका प्रमुख मालपोत अधिकृत टुना श्रेष्ठले विभिन्न व्यक्तिले हडपेको भत्केको पुल क्षेत्रमा रहेको सरकारी जग्गा पुनः सरकारकै नाममा ल्याइएको जानकारी दिए । २ चैतमा मालपोत कार्यालयले सो जग्गा सरकारको नाममा ल्याउने निर्णय गरेको हो ।

विभिन्न भूमाफियाले यसअघि मन्त्रिपरिषद् कार्यालय, मन्त्री, सचिव तथा सरकारी कर्मचारीसँग मिलेमतो गरी सो जग्गा गोकर्णेश्वर पञ्चामृत गुठीका नाममा ल्याएर आफ्नो नाममा मोही कायम गराउँदै जग्गा दर्ता गराउन सफल भएका थिए ।

२०६७ साल १४ मंसिरमा बसेको मन्त्रिपरिषद् बैठकले भत्केको पुल क्षेत्रमा रहेको कित्ता नम्बर ५०५ को सो जग्गालाई गोकर्णेश्वर पञ्चामृत गुठीका नाममा मोही कायम हुनेगरी दर्ता गरिदिन निर्णय गरेको थियो । सो निर्णयसँगै भूमाफियालाई जग्गा हडप्ने बाटो खुलेको थियो ।