चैत १५, स्थानीय तहको चुनाव नजिकिएसँगै दोलखा जिल्लाको उत्तरी भागमा नेकपा (माओवादी) केन्द्र छोडेर नेकपा एमाले प्रवेश गर्नेहरुको लहर चलेको छ । 
बैशाख ३० गते हुन गइरहेको निर्वाचनमा माओवादी कम्युनिष्ट आन्दोलनबिरोधी गठबन्धनमा सहभागी हुने भएकोले पुराना र इमान्दार नेताहरु धमाधम एमाले रोज्न थालेका हुन ।
एमाले पोलिटब्यूरो सदस्य तथा पूर्वसञ्चारमन्त्री पार्वत गुरुङको जन्मस्थान गौरीशंकरमा माओवादीका सबै नेताहरु एमाले प्रवेश गरेका हुन । 
माओवादी केन्द्रका निर्वाचन क्षेत्रीय संयोजक रहनुभएका जिल्लाकै प्रभावशाली नेता निमा लामा आज आफ्नो वडाको सिंगो टीम बिलय गराउँदै निर्वाचन क्षेत्रका अन्य प्रभावशाली नेता–कार्यकर्तासहित एमालेमा प्रवेश गर्नुभएको छ ।

लामो समयदेखि माओवादीमा क्रियाशील नेता लामालाई आज उहाँकै वडा झ्याँकूमा पुगेर पूर्वमन्त्री एवं एमाले नेता गुरुङ, एमाले दोलखा इञ्चार्ज सरस्वती बस्नेतसहितका नेताहरुले पार्टीमा स्वगत गर्नुभएको छ ।

लामासँगै माओवादी दोलखाका सचिवालय सदस्य शंखङिमा शेर्पा, मिङगुर शेर्पा, अशोक तामाङ, छिरिङ डोमा शेर्पा, नुर्वु शेर्पा, नाम्गेल शेर्पालगायतका नेताहरु एमाले प्रवेश गर्नुभएको छ । आज आयोजित कार्यक्रममा नेता लामाले नेकपा एमालेका अध्यक्ष केपी शर्मा ओलीको भिजन र दोलखामा पार्वत गुरुङ जस्ता बिकाशवादी र सवैलाई समान ब्यवहार गर्ने कामबाट आफू एमालेमा आएको बताउनु भयो ।