मंगलवार २० मंसिर, २०७९
मंसिर २० काठमाडौं, प्रतिनिधिसभाको समानुपातिक पद्धतितर्फको मत गणना सकिएको छ । सबै जिल्लाबाट मत गणना सकिएको जानकारी आएको छ र मत रुजु गर्ने काम भइरहेकाले केही मत तलमाथि हुनसक्ने निर्वाचन आयोगका अधिकारीहरुले बताए ।
कुल १ करोड ५ लाख ६० हजार ६७ मत सदर भएको छ भने नेकपा (एमाले) २८ लाख ४५ हजार ६४१ मतसहित पहिलो दल बनेको छ । यसअनुसार एमालेले जम्मा ३४ सिट पाउनेछ ।
प्रत्यक्षतर्फ ४४ सिट जितेको एमाले ७८ सांसदसहित प्रतिनिधिसभाको दोस्रो दल बनेको छ ।
नेपाली कांग्रेसले २७ लाख १५ हजार २२५ मत पाएको छ । यसअनुसार उसले ३२ सिट मात्र पाउने छ । प्रत्यक्षतर्फ ५७ सिट जितेको कांग्रेस ८९ सांसदका साथ प्रतिनिधिसभाको पहिलो दल बनेको छ ।
माओवादी केन्द्र समानुपातिकमा पनि तेस्रो दल बनेको छ । उसले ११ लाख ७५ हजार ६८४ मत पाएको छ र, १४ सिट पाउनेछ । प्रत्यक्षतर्फ उसले १८ सिट जितेको छ ।
