रामेछापको मन्थली नगरपालिकाले एक वर्षमा अवलोकनीय प्रगति प्राप्त गरेको छ। सार्वजनिक प्रवृत्ति र क्षमता विकासकोे नगरपालिकाले प्रगति गरेको देखिएको छ ।

नगरपालिकाले गत आर्थिक बर्ष २०७९/८० मा चालूतर्फ ६६ करोड, १८ लाख ७३ हजार ८ सय ८३ रुपैयाँ अर्थात ८४.१ प्रतिशत र प्रतिशत र पुँजीगततर्फ २६ करोड ६२ लाख ६३ हजार ७ सय १० रुपैयाँ अर्थात ७०.७६ प्रतिशत गरी जम्मा ९२ करोड ८१ लाख ३७ हजार ५ सय ९४ अर्थात ७९.७९ प्रतिशत खर्च गरेको छ ।

 गत आर्थिक बर्षमा आर्थिक बिकासतर्फ ७६.३९ प्रतिशत, सामाजिक बिकासतर्फ ८८.४७ प्रतिशत, पूर्वाधार बिकासतर्फ ६९.७६ प्रतिशत, सुशासन तथा अन्तर सम्बन्धित क्षेत्रतर्फ ५३.३३ प्रतिशत र कार्यालय सञ्चालन तथा प्रशासनिकतर्फ ८३. ३४ प्रतिशत खर्च भएको नगर प्रमुख लव श्रेष्ठले बताएका हुन् ।

 यस आर्थिक बर्षमा कुल प्रक्षेपित आम्दानीको ९०.६६ प्रतिशत राजस्व संकलन गरेको उल्लेख छ । नगरपालिकाले सो आर्थिक बर्षमा ३ करोड ७३ लाख आम्दानी गर्ने लक्ष लिएकोमा ३ करोड ३८ लाख १५ हजार ६ सय ८० रुपैयाँ राजस्व संकलन गरेको नगर प्रमुख श्रेष्ठले बताएका हुन् ।

सडक पूर्वाधार तर्फ सावाँडाँडा–पशुपति–सिक्राल–साउनेपानी सडक, देविटार–फुलासी (पोखरीडाँडा) सडक, भुत्याखोला–कठजोर सडक, ठूलीमदौ–अर्चले–डाँडागाउँ सडकहरुको चालु आवमा करिब ६ कि.मि. कालोपत्रे सम्पन्न भएको छ । 

यसै अवधिमा नगर गौरवको आयोजनाको रुपमा आ.व. २०७६/७७ मा शुरु भएको ४ सय जना भन्दा बढी सहभागी अट्ने सभा भवन, स्वीमिङ्पुल प्रशासनिक तथा क्याफ्टेरिया भवनसहितको करिब १७ रोपनीमा फैलिएको तीनलाल पार्क संघीय सरकारको ६० प्रतिशत लागत साझेदारीमा सम्पन्न भइसकेको नगरप्रमुख श्रेष्ठले बताउनुभयो । सो पार्क सञ्चालनका लागि आवश्यक थप पुर्वाधार निर्माण तथा व्यवस्थापन गरी यथाशिघ्र सञ्चालनमा ल्याइने नगरपालिकाको भनाई रहेको छ ।

श्रेष्ठका अनुसार आव २०७७/०७८ मा वडा नं ६ को नवुघाट लिफ्ट सिँचाई योजना सुरु भएको तीन आ.व. मा कूल ७५ लाखको लागतमा निर्माण सम्पन्न भई सञ्चालनमा ल्याइएको छ भने मन्थली–चनखु–पोखरीडाँडा सडकको महादेवटार खोला तथा मन्थली–गेलु सडकको बफरखोलामा ह्यूमपाइप कल्भर्ट निर्माण गरी वर्षातको समयमा पनि सडक सुचारु हुने व्यवस्था मिलाइएको छ ।