_{१२ फागुन, काठमाडौं । 
नेकपाका उपाध्यक्ष बामदेव गौतमले अध्यक्षद्वय केपी शर्मा ओली र पुष्पकमल दाहाल ‘प्रचण्ड’लाई तत्काल पार्टी सचिवालयको बैठक बोलाउन माग गरेका छन् ।
संसद विघटन बदर भएपछिको परिस्थितिबारे छलफल गर्न गौतमले बैठक बोलाउन माग गरेका हुन् ।
गौतमले आज सार्वजनिक गरेको प्रेस विज्ञप्तिमा  ‘नेपाल कम्युनिष्ट पार्टी नेकपा को उपाध्यक्षको हैसियतले म दुवै अध्यक्ष क केपी शर्मा ओली र क।प्रचण्डसँग तुरुन्तै सचिवालय बैठक धुम्वाराहीस्थित पार्टीको केन्द्रीय कार्यालयमा बोलाउन अनुरोध गर्छु ।’लेखिएको छ।}

_{गौतमले राष्ट्रपति विद्यादेवी भण्डारीलाई सर्वोच्च अदालतको फैसलालाई स्वागत गर्दै प्रतिनिधि सभा अधिवेशन आह्वान गर्न र प्रधानमन्त्री केपी शर्मा ओलीलाई ढिला नगरी पदबाट राजीनामा दिन पनि सुझाव दिएका छन् ।
 संसद विघटन बदर भएको दिनलाई उनले निरंकुशता, स्वेच्छाचारीता, अराजकता र दुराचारीताको पराजय तथा संविधान, कानुन, लोकतन्त्र र जनताको सर्वभौमिकताले पुनर्विजय प्राप्त गरेको ऐतिहासिक दिनको रुपमा समेत उल्लेख गरेका छन् ।}