शुक्रबार ३१ बैशाख, २०७८
वैशाख ३१, काठमाडौँ । मुलुकको राजनीति रहस्यमय बाटोमा धकेलिएको टिप्पणी नेपाली कांग्रेसका वरिष्ठ नेता रामचन्द्र पौडेलले गरेका छन् ।
प्रधानमन्त्री केपी शर्मा ओलीले प्रतिनिधिसभामा विश्वासको मत लिन नसके पनि पुनः प्रधानमन्त्री बन्ने अवस्था श्रृजना भएकोले कयौं संसय उब्जाएको उनले बताए ।
संघीय संसद भवन नयाँ वानेश्वरमा शुक्रबार कोभिड १९ विरुद्धको खोपको दोश्रो डोज लगाएर बाहिरिदै गर्ने क्रममा संचारकर्मीलाई संक्षिप्त प्रतिक्रिया दिँदै उनले मुलुकको राजनीति रहश्यमय बाटो अघि बढेको र सयौ संसयहरु उब्जाएको बताए ।
उनले भने, ‘संसदलाई फाल्ने प्रयत्न अझै पनि जारी छ । त्यो कुरा कसरी समाधान हुन्छ । संसदले पुरा आयु बाँच्न पाउँछ कि पाउँदैन ।’
उनले भने, ‘संविधानले बाँच्न पाउँछ कि पाउँदैन । जनताले बाँच्न पाउँछन् कि पाउँदैनन् । यस्तो कोरोना छ । यो कोरोनाको बीचमा लगेर फेरि तमासाहरु हुन थाल्यो भने फेरि जनता नै बाँच्ने कुरा आउँछ । त्यसकारण जनता बाँच्ने कुराको पनि चिन्ता छ ।’