जेठ २०, काठमाडौँ । आर्थिक वर्ष ०७८/७९ को जेठ १५ गते सार्वजनिक गरिएको बजेटमा कक्षा १२ सम्म अध्ययन गर्ने छात्रछात्रालाई सरकारले निःशुल्क पाठ्यपुस्तक उपलब्ध गराउने घोषणा गरेको छ ।

पर्याप्त जनशक्ति र छपाइ मेसिन उपलब्ध रहेकाले सरकारी प्रतिबद्धता कार्यान्वयनमा ल्याउने कुनै समस्या नहुने र जनक शिक्षा सामग्री केन्द्रले तयारी सुरु गरीसकेको केन्द्रले स्पष्ट गरेको छ ।

यसअघि कक्षा १० सम्मका विद्यार्थीलाई पाठ्यपुस्तक उपलब्ध गराएको सरकारले यो पाली भने कक्षा १२ लाई पनि विद्यालय तहकै रूपमा अङ्गीकार गरेको छ ।

सरकारले भनेकै समयमा पुस्तक उपलब्ध गराउन सक्षम रहेको जानकारी जनक शिक्षाका महाप्रबन्धक अनिलकुमार झाले दिनुभयो । हाल जनक शिक्षाले कक्षा ११ का नेपाली, अङ्ग्रेजी, सामाजिक विषयका पाठ्यपुस्तक छपाइ गरिरहेको छ । 

गतवर्ष पनि जनक शिक्षाले कक्षा ११ का अनिवार्य विषयका पाठ्यपुस्तक प्रकाशन गरी बिक्री वितरण गरेको थियो ।
कक्षा १२ को पाठ्यपुस्तक भने पाठ्यक्रम विकास केन्द्रले छपाइका लागि स्वीकृति दिन बाँकी रहेको जनाएको छ । 

विद्यालय तहको नयाँ शैक्षिक सत्र असारबाट नैे प्रारम्भ गर्ने निणर्य यसअघि नै सरकारले गरिसकेको छ । यो अवस्थामा नयाँ शैक्षिक सत्र प्रारम्भ भएलगत्तै विद्यार्थीको हातमा नयाँ पुस्तक पुर्‍याउन समस्या नहुने जनक शिक्षाले दाबी गरेको छ ।

हालै भने जनक शिक्षाले सामुदायिक विद्यालयमा कक्षा १० सम्म अध्ययन गर्ने विद्यार्थीलाई आवश्यक पर्ने पुस्तक छपाइ कार्य पूरा गरेर बिक्री वितरणको तयारी सुुरु गरेको छ । कक्षा ४ देखि १० सम्म एक करोड ७७ लाख थान पुस्तक छपाइ गरिएको छ । प्रदेशका कार्यालयमा यसको वितरणका लागि पठाइसकिएको जानकारी महाप्रबन्धक झाले दिनुभयो ।

काठमाडौँ उपत्यकाका तीन जिल्लाले सरकारी छापाखानाको ढुवानीलाई सवारीसाधनमा ब्यानर वा प्रिन्ट राखी राति ९ बजेदेखि बिहान ९ बजेसम्म न्यूनतम जनशक्ति प्रयोग गरेर काम गर्न बाटो खोलिदिएका छन् । जनकका विराटनगर, जनकपुर, भरतपुर, पोखरा, बुटवल, नेपालगञ्ज, सुर्खेत र धनगढीमा प्रदेश कार्यालय रहेका छन् ।

विद्यार्थीको हातमा पुस्तक पुर्‍याउन यतिले मात्रै सम्भव नहुने महाप्रबन्धक झाले बताउनुभयो । सबै जिल्लामा पुस्तक पसल खुल्ने या जनक शिक्षाका बिक्रेताले पुस्तकको कारोबार गर्न पाएमा विद्यार्थीको हातमा पुस्तक पुर्‍याउन सम्भव हुने उनले बताए ।