थुनिएको मर्स्याङ्दी आफैं बग्न थाल्यो, मनाङसँग सडक सम्पर्क विच्छेद

आईतवार ६ असार, २०७८ विचारवाटिका 1622

असार ६, काठमाडौं । मनाङको ङिस्याङ गाउँपालिका ४ हुम्देमा शनिबार दिउँसो गएको पहिरोले थुनिएको मर्स्याङ्दी नदी आफैं बग्न थालेपछि हालैको लागि ठूलो जोखिम टरेको प्रहरीले जनाएको छ ।

कमलो किसिमको माटोसहितको पहिरो खसेकाले केही समयमै पानीले आफैं बाटो बनाएर बग्न थालेपछि ठूलो क्षतिको सम्भावना टरेको जिल्ला प्रहरी कार्यालय मनाङका डिएसपी सुवास खड्काले बताए ।

मर्स्याङ्दी नदी ताल भन्दा माथिल्लो मनाङ जाने बाटोमा पर्ने बेलिब्रिज जोखिममा परेको थियो ।

सडक सम्पर्क विच्छेद

मुख्य सडक लम्जुङको बेसिशहर-चामे-थाङसार सडकखण्ड ७० प्रतिशत ‘कोल्याप्स’ भएपछि सडक सम्पर्क टुटेको डीएसपी खड्काले बताए । उनले भने, ‘सडक सम्पर्क टुटेकाले अब हवाई बाहेक अरु विकल्प छैन ।’ ग्रामीण सडकहरु पनि पहिरोले भत्किएको उनले बताए । मनाङ सडक सम्पर्कबाट विच्छेद भएको छ ।

माथिल्लो मनाङतिर माटो र ढुंगाले बनेका कतिपय घरहरु भत्किएका र कतिपय घरहरु उच्च जोखिममा रहेका प्रहरीले बताएको छ ।