फागुन २६ काठमाडौं, यहि शनिबार उपराष्ट्रपति चुनावको मनोनयन दर्ता गर्नुपर्ने तालिका छ । हिजो भएको राष्ट्रपति चुनावमा गठबन्धनका उम्मेदवार रामचन्द्र पौडेलले ३३ हजार ८०२ मत ल्याउदाँ एमाले उम्मेदवार सुवास नेम्वाङले १५ हजार ५१८ मात्र मतभार पाए ।

उपराष्ट्रपति चुनावमा पनि यस्तै परिणाम दोहोरिन नदिन एमालेले प्रयास गर्ने देखिएको छ । बिहीबार संसद भवनमा राष्ट्रपतिको चुनावमा मतदान चलिरहँदा कांग्रेस उम्मेदवार पौडेल मत मागिरहेका थिए भने एमाले उम्मेदवार नेम्वाङ मतदानपछिको प्रतिक्रियापछि संसद भवन परिसरमा देखिएनन् ।

राष्ट्रपतिको मतदान चलिरहँदा उपराष्ट्रपतिमा गठबन्धनबाट उम्मेदवारको रूपमा चर्चामा आएका यादवसँग फोटो खिचाउने सांसदहरूको उपस्थिति बाक्लो देखिन्थ्यो । ‘अबको उपराष्ट्रपति उहाँ नै हुनुहुन्छ । त्यसैले फोटो खिचेको,’ गठबन्धनका एक सांसदले भने । त्यो बेलासम्म पार्टीले यादवको उम्मेदवारीबारे कुनै निर्णय गरेकै थिएन । सांसदहरूले घेरेको समयमा यादवले भने, ‘सबैको सद्भाव पाएको छु ।’
 चुनावमा आफ्नो मत दिएर  पार्टी कार्यालय बालकुमारीमा केन्द्रीय कार्यकारिणी समितिको बैठकमा सहभागी हुन पुगे । झण्डै एक घण्टा बसेको बैठकले उनैलाई उपराष्ट्रपतिको उम्मेदवार बनाउने निर्णय ग¥यो । 

सत्ता गठबन्धनमा अरु दलको दाबी नरहेको र जसपाको उपराष्ट्रपतिमा दाबी स्वाभाविक रहेको पार्टीका नेताहरू बताउँछन् । तर, गठबन्धन दल माओवादीभित्र पनि उपराष्ट्रपतिमा दाबी छोड्न नहुने दबाब रहेको छ ।

नागरिक उन्मुक्ति पार्टीको संसदीय दल कार्यसमिति बैठकले उपराष्ट्रपतिमा पार्टी अध्यक्ष रञ्जिता श्रेष्ठलाई उम्मेदवार बनाउने निर्णय ग¥यो । तर, त्यो निर्णय कच्चा देखियो । राष्ट्रपति तथा उपराष्ट्रपति निर्वाचन ऐनअनुसार राष्ट्रपति र उपराष्ट्रपतिमा उम्मेदवार हुन ४५ वर्ष पुगेको हुनुपर्छ । 

गठबन्धनको अर्को दल जनमत पार्टीले पनि उपराष्ट्रपतिमा दाबी गरिरहेको छ । आज  बसेको पार्टीको कार्यकारिणी समितिको बैठकले ममता झालाई उपराष्ट्रपतिको उम्मेदवार बनाउने निर्णय गरेको हो । झा जनमत पार्टीकी सप्तरी जिल्ला इन्चार्ज हुन् । यसबारेमा गठबन्धनका दलहरूसँग छलफल गरेर निश्कर्षमा पुगिने पार्टी उपाध्यक्ष अब्दुल खानले बताएका छन् ।

एमालेले आफ्नो उम्मेदवार तय गरिसकेको छैन । जसका लागि एमाले सचिवालय बैठक शनिबार ९ बजे बस्दैछ । उसले महिला उम्मेदवार तय गर्ने भएको छ । ‘हाम्रो उम्मेदवार मनोनयनको दिन बिहान तय हुन्छ । तर, महिला नै हुन्छ,’ एमाले उपमहासचिव पृथ्वीसुब्बा गुरुङले भने ।