वैशाख ३१, काठमाडौं । आज हिन्दू सम्प्रदायका मानिसहरूले जौको सातु र सर्वत खाएर वैशाख शुक्ल तृतीया अर्थात् अक्षय तृतीया मनाउँदैछन् । यस दिन विष्णु र लक्ष्मीको पूजा गर्नुका साथै दान गरेमा शुभ फल मिल्ने धार्मिक विश्वास छ ।

उष्ण गर्मीको समयमा शीतलता प्रदान गर्ने आहारको रुपमा जौको सातु र सर्वत पानी खाएर अक्षय तृतीया मनाउने गरिएको जानकारहरू बताउँछन् ।

यो दिनमा प्राचीनकालदेखि नै अनेक किसिमका विशेष कार्यहरू भएका छन् । त्यसैले यसलाई विशेष दिनको रुपमा मान्न थालिएको पञ्चाङ्ग निणर्ायक समितिका अध्यक्ष प्रा‍.डा. रामचन्द्र गौतमले बताए ।  

गौतमका अनुसार वैशाख तृतीयाकै दिनदेखि त्रेता युगको सुरुवात भएको हो । यो दिन शिव-पार्वतीको विवाह पनि भएको थियो । त्यसैले यस दिन गरेको स्नान, दान र शुभ कर्मलाई विशेष महत्वका साथ हेर्ने गरिन्छ । यही दिन भगवान परशुराम अवतारको जन्म भयो । त्यसैले यस दिनलाई परशुराम जयन्तीको रूपमा पनि मनाइन्छ । 

अक्षय तृतीयका दिन सूर्य तथा चन्द्रमा आफ्ना उच्च राशिमा रहने ज्योतिषशास्त्रका अनुसार बताइएको छ । यसकारण यो दिन पञ्चांग नहेरी पनि कुनै पनि शुभकार्य गर्न सकिन्छ । 

सुन खरीद, नयाँ सामान खरीद, विवाह, गृहप्रवेश, पदभार ग्रहण, सवारी साधन खरीद, भूमि पूजा तथा नयाँ व्यापारका लागि यस दिन अति उत्तम हुने विश्वास गरिन्छ । शास्त्रका अनुसार यो दिन स्वयंसिद्ध मुहूर्त हो ।