असोज २६, काठमाडौं । बडादसैँअन्तर्गत नवरात्रको दोस्रो दिन आज नवदुर्गामध्येकी दोस्रो देवी ब्रह्मचारिणीको विधिपूर्वक पूजा आराधना गरिँदैछ। नवरात्रका अवसरमा देशभरका शक्तिपीठ तथा देवी मन्दिरहरूमा बिहानैदेखि पूजा आराधना र दर्शन गर्ने भक्तजनको भीड लागेको छ।
नवरात्रको पहिलो दिन आइतबार वैदिक विधिअनुसार दसैँघर तथा पूजा कोठामा घटस्थापना गरी जौको जमरा राखिएको थियो। सोही दिन नवदुर्गाकी पहिलो देवी शैलपुत्रीको पूजा आराधना गरिएको थियो। आज घटस्थापना गरिएको स्थानमा ब्रह्मचारिणी देवीको आह्वान गरी पूजा गरिँदैछ।
धार्मिक मान्यताअनुसार ब्रह्मचारिणी देवी तपस्या, त्याग, संयम र साधनाको प्रतीक हुन्। सच्चिदानन्द स्वरूप ब्रह्मको बोध गराउन निरन्तर साधनामा लागिरहने देवी भएकाले उहाँलाई ब्रह्मचारिणी भनिएको विश्वास गरिन्छ।
नवरात्रका नौ दिन घटस्थापना गरिएको स्थलमा दुर्गा सप्तशती (चण्डी), श्रीमद्देवीभागवतलगायत देवी स्तोत्र पाठ गर्ने परम्परा छ। वैदिक सनातन धर्मावलम्बीले शक्ति, ऐश्वर्य र विद्या प्राप्त हुने धार्मिक विश्वासका साथ आश्विन शुक्ल प्रतिपदादेखि नवमीसम्म दुर्गा भवानीको विशेष पूजा आराधना गर्छन्।
नौ दिनसम्म विधिपूर्वक पूजा आराधना गरेपछि विजयादशमीका दिनदेखि कोजाग्रत पूर्णिमासम्म देवीको प्रसादस्वरूप टीका र जमरा लगाउने परम्परा रहेको छ।
यसैबीच, हनुमानढोका दरबारस्थित दसैँघरमा पनि राज्यका तर्फबाट विधिपूर्वक ब्रह्मचारिणी देवीको पूजा आराधना गरिने हनुमानढोका दरबार हेरचाह अड्डाले जनाएको छ। नवरात्रका अवसरमा शक्तिपीठहरूमा भक्तजनको चहलपहल बढेसँगै देशभर दसैँको धार्मिक र सांस्कृतिक माहोल थप उत्साहपूर्ण बनेको छ।